LAHI na ang mga bag-ong tubo ning panahona kay pipila kanila bisan og bata pa, hinati na og mga istorya nga para lang unta sa mga hamtong.

Di, hinuon, tanan kay duna man say mga kabataan karon nga namatuto og maayo ug nadisiplina sa ginikanan.

Apan duna gyuy pipila usab nga di na mabadlong kay mosuhi na og mga hamtong, ilabi na gyud og korehian sa ilang mga sayop nga buhat ug mga pulong.

Ang uban gani nila, mahibawo nang mamalikas nga di maayong paminawon.

Tingali gumikan sab sa ilang nadungog ug nakita gikan kanatong mga hamtong. Kay ingon pa lagi, kon unsay makita o madungog sa mga bata gikan sa hamtong, maoy ilang sundon.

Sa Baguio City, mipanday ang lokal nga kagamhanan og ordinansa nga nagdili na sa mga “profane language” sa tanang mga tulunghaan, computer shops ug sa mga establisemento nga naay mga bata.

Mga titser nga makadungog sa mga bata nga mamalikas o kaha manunglo gimandoan nang mohimo og aksiyon ug badlungon sila.

Kay usahay, i-tolerate ra man sab kay mao nay naandan o “trend” sa panahon nga dili baya sab maayo.

Apan angay kita nga mga hamtong magpakabana sa maong isyu. Kinahanglan sab nga magbantay kita sa atong mga gihimo ug gipamulong aron nga mahimo kitang sumbanan sa maayo alang sa mga bata.

Apan mas nindot gyud unta kon diha pa lang mismo sa balay, sugdan na ang maayong pamatasan aron sa paggawas sa mga bata, nahibawo na sila kon unsay angay buhaton o di kay mao may nakita gikan sa ilang ginikanan.