SAMTANG nagkaduol na ang 2022 nasyonal ug lokal eleksiyon halos hikalimtan na nato ang dakong problema nga giatubang sa atong nasud ang pandemic Covid-19, ug tua na ang tanang atensiyon sa mga politiko sa umaabot nga bugnong lugayno.

Ang oposisyon nagmugna na sa ilang 1SAMBAYAN ug ang makapatingala kay ang namuno dili politiko?

Matud pa's mga eksperto naisahan ang mga dilawan ni retired Associate Justice Antonio Carpio. Dili politiko apan mao na hinuoy nangulo sa mga maas nga politiko kon kinsay ilang standard bearer nga i-atbang sa mga kandidato sa administrasyon.

Pero ang nasentro karon sa atensiyon sa mga lungsuranon mao ang atong hero sa sport nga si Manny Pacquiao. Gikadyawan sa ubang mga politiko ug sa sekreto, mga pipila ka kauban niya sa Senado kay dugay ra diay ni siya mihunghong kang Senador Panfilo Lacson ug Senate President Tito Sotto nga nagtinguha siya nga modagan sa pagka- presidente.

Pero ang atong naluy-an kang Pacquiao kay bisan sa mga kauban niya sa Senado ni isa, walay mikampi sa kaniya nga mosuporta. Kay si Lacson mismo mipadayag na nga tali ni Pacquiao ug Sotto, adto siya kang Sotto mosuporta.

Si Pacquiao wa gyud intawon kabangkaagan sa sistema sa politika, ngano? Naa siya sa Partido Demokratikong Pilipino (PDP-Laban) ug aduna pay ranggo isip bise presidente, apan iyang gikalaban ang mga de ranggong opisyal sa partido? Sama kang Vice Chairman Energy Secretary Alfonso Cusi.

Gawas niini, iyang gipatapsing-tapsingan og atake si Presidente Rodrigo Duterte nga "Huwag muna tayong mamolitika harapin muna natin ang malaking problema nang ating bansa na ginugotom tulongan muna natin sila".

Nakalimot si Pacquiao nga ang chairman sa PDP-Laban mao si Presidente Duterte. Kon may kabangkaagan pa siya, dili niya pangatakihon ang iyang kauban sa partido? Kay ang tanang mga aspirante sa pagka-presidente sa usa ka partido, i-submit ang ilang kaugalingon sa National Party Convention ug kinsay mapili, mao kadto ang standard bearer nga kandidto sa pagka-presidente sa maong partido.

Pero si Pacquiao nagbuot-buot lang og iyaha. May posiblidad nga palagputon si Pacquiao sa PDP-Laban apan modagan gyud siya kay daghan na ra ba og gipanghatagan og bugas. Puwede independente kay di man pud siya dawaton sa United opposition kay gisaway na man gani siya ni Antonio Carpio.

Matud ni Carpio, "Manny Pacquiao kwalipikado modagan sa pagka-presidente base sa atong constitution, apan kulang siya sa high standard."

Si Department of Foreign Affairs (DFA) Secretary Teodoro Locsin nagkomento kang Pacquiao, "Don't vote him for president, but honor him." Tungod kay naghatag si Pacquiao og dakong dungog sa atong nasud sa natad sa isports.

Dapat dunay makatambag kang Pacquiao kay dungog lang ug ang pagkailado sa iyang pangalan maoy iyang gisakyan nga modagan sa pagka-presidente, bisan ug wa gyud tawon siyay kabangkaagan.

Dili basta-basta ang pagka-presidente Manny, kinahanglan puno ka sa kargada EDUKASYON UG EKSPERYENSIYA.