GINAINGON nga ulahi na ang pagbasol ug pagmahay.

Usa ka naparot nga re-electionist nga kandidato pagka-kapitan sa Agdao District nagmahay na karon nganong nidagan pa pagbalik bisan kung salawayon ang gibuhat sa iyang termino.

Ingon niya nga mapalit ra ang botante sa iyang barangay busa kampante siya kay naggahin na siya'g hapit P3M para sa eleksiyon.

Unang termino pa lamang siya ug gipakita na niya ang iyang pagkawalay-alamag sa balaod ilabi na sa Local Government Code nga maoy tamdanan sa tanang local government unit.

Gihimo niyang daw pribadong negusyo ang barangay nga siya ang manager. Iya tanang yawyaw sa sesyon imbis nga mopatunga sa panaghisgot sa konseho.

Gikuhaan niya'g katungod nga mo-istorya ang mga konsehal nga dili niya kaabin o kaha moalkontra sa iyang ideya.

Ang nakaparat pa kay gitangtang sila sa ilang komitiba nga gihuptan ug gihatag sa uban bisan walay alamag sa trabaho.

May panahon nga wala sila suweldohi kay absinot daw ug mosukol sa kapitan. Niabot pa sa Department of Interior and Local Government (DILG) ug Sangguniang Panlungsod ang ilang kaso kay dili motuo sa balaod ang kapitan kay lagi siya ang hawod.

Gahi pa sa batong bantiles ang iyang baruganan nga dili sila bayran hangtud nga gimandoan siya sa DILG nga dili makatarunganon ang iyang gihimo. May panahon sab nga lipat-lipaton ug dili sila sultihan sa petsa sa sesyon o ang agenda aron dili makatambong.

Dili sila tagaan ug kopya sa ilang resolusyon o ordinansa nga gipanday kung mangayo sila bisan kung public documents kini. Aduna pay anomaliya kabahin sa kuwarta sa barangay.

Sumala sa akong nasagap nga balita, adunay kalihukan nga dako ang pundo nga gipaguwa apan wala diay buhata. Gi-withdraw na ang dakong budget bisan kung dugay pa ang mga kalihukan sa barangay.

Ang nahitabo gitigi-tigi ang paghatag sa kapitan sa pundo imbis nga kausa kini buhaton subay sa Program Design sa maong kalihukan.

Giunsa man diay niya ang napundong kuwarta? May gibaniog ra ba nga balita nga nagpatanto ang igsuon sa kapitan sa mga barangay functionaries. Iya kaha kadtong kuwarta nga gipatanto?

Nangutana lang. Matud pa nga naghimo ang Barangay Treasurer ug Secretary og Program Design aron moguwa ang budget sa barangay bisan wala buhata o dili sakto ang pagbuhat.

Kadtong mga barangay kagawad nga dili sa kapitan wala makahibalo kung may resolusyon ba sa barangay ang maong proyekto. Ang ilang rang nahibaloan nga gi-implementar na kini.

Dugang pa nila nga nipalit pa og Official Receipt ang Barangay Treasurer sa ilang mga supplier aron iapil isip supporting documents.

Kining anomaliya sa pinansiya kinahanglang imbestigahan ug aksiyonan sa Commission on Audit aron dili pod unfair sa kanhi kapitan.

Panahon na usab nga molihok ang DILG aron tun-an ug pahimangnoan ang tanang nidaug sa pagka-opisyal sa barangay ang Local Government Code ug dili ilang pribadong negusyo ang barangay.

Dapat kining molihok dayon kung may ingon aning panghitabo o tendensiya sa kapitan nga mahimong diktador sa iyang barangay.

Bantay mong mga pasaway nga opisyal kay kamo ang sunod!