“Sama sa balud, madala kita sa lugar diin kita madaut o mahatod sa kung asa kita puwede magsugod. Sama man sa “tidal wave” ang mga balud sa pagsulay, hinumdomi nga walay forever; molabay ra kini...”

SA MGA adik og telenovela o drama, Pinoy man o langyaw’ng mga artista- kumusta?

Si Mam Khan Quieta sa Panabo Center for Social Welfare Development Service Office ang nagrekomenda nga tan-awon nako ang salidang, “Kleun Cheewit” kay super nice daw.

Ang titulo nagpasabot “Balud sa Kinabuhi” sa pinulungang Thai (Thailand god). Kinse ka episode nga 1 hour and 44 minutes matag-episode, miga, mao sa sulod sa tulo ka adlaw- ning uga akong mata dili moundang kung dili mahuman ang salida ha ha!

Tuig 2000 pa ko nabuang sa mga drama sa Korean. Wala pa nauso ang pagsikat sa ilang mga salida sa nasud, human na ko’g tan-aw sa, “Jewel in the Palace” ni Lee Young-ae nga si Dae Jang Geum sa salida. Intawon, 26 ka CD sud sa usa ka semana ang nahuman nako kay hastang nindota lagi sa maong drama.

Paborito nako si Seo Jin-lee sa tanang Koreanong artista kay super sexy, pogi ug hastang hawda nga artista. Tan-awa ninyo nang Li-San, Lovers ug Gyebaek nga gibidahan niya kay makahilak gayud kamo’g tagok, miga. Mao kini akong simpleng tambal sa kalaay kay nindot gayud manulat ang script sa drama ang mga Koreano dili pareha sa atoa nga bisan nabuthan og bomba, gidunggab, naligsan ug uban pa- di mamatay sama ni Cardo Dalisay.

Bitaw, nindot ang Kluen Cheewit kay gawas sa mora’g si Catriona Gray o Maegan Young ang bidang babaye, mas guwapo pa kay Enrique Gil ang pares niya unya nindot pod moarte.

Nagsentro sa mga pagsulay daw sama sa balud sa dagat ang istorya. Dili layo sa mga naatubang ug maatubang nato, higala, apan nagmalahutayon sila tungod sa “kugmo” ESTE “gugma.”

Sama sa balud, madala kita sa lugar diin kita madaut o mahatod sa kung asa kita puwede magsugod. Sama man sa “tidal wave” ang mga balud sa pagsulay, hinumdomi nga walay forever, Inday; molabay ra kini mao dili kita magpapildi sa kaluya, pare. Sama sa barko, let’s “go with the flow” aron kita mag-”glow” luyo sa kalisdanan, migo. Getch?