DUNAY ilusad nga "earthquake awareness" nga kalihukan sa Barangay Mintal aron komunidad nga nahimutang sa mga fault lines sa Davao City makaandam.

Gisulti ni Marvin Samson, hepe sa Capacity Building Training Section sa Office of Civil Defense in Davao Region (OCD-Davao) nga puntirya nila nga makalusad sa maong kalihukan sa ikaduhang semester karong tuiga.

Kini pangunahan sa OCD-Davao sa pakig-alayon uban ang Philippine Institute of Volcanology and Seismology (Phivolcs), lokal nga panggamhanan sa Davao, ug ang barangay yunit sa Mintal.

Sumala ni Samson nga ang nag-unang tumong sa kalihukan mao ang pagmugna og saktong kaamgohan bahin sa mga linog ug pagmonitor sa kahimtang sa mga kumonidad ug pamilya nga nanimuyo duol sa mga fault lines.

Tug-an niya nga ang saktong kaamgohan mao ang pagmugna og kapasidad ug kaandam sa mga tawo aron malikayan ang pagkataranta atol sa panahon sa linog.

Palig-unon sila pinaagi sa paghatag og impormasyon ug pag-edukar nga naglakip sa serye sa webinar ug earthquake drills.

Giklaro ni Samson nga ang kalihukan mao ang "follow-up" sa gihimo sab nga kampanya sa Mintal sayo niini nga mao ang Nationwide Earthquake Drill niadtong 2017 ug ang Walk the Fault niadtong 2019 nga nag-ila sa mga lugar sa barangay kon asa naa ang mga fault lines.

Samtang si Barangay Mintal captain Rey Bargamento nagkanayon nga mga molupyo sa Mintal nahimo nang aktibo may kabahin sa pagtubag sa panahon nga dunay linog.

Sulti niya nga ang earthquake drills nakatabang sa pagpromotar sa disaster preparedness ug magpadayon sila sa paghimo niini aron nga mas palapdan ug palambuon pa ang "resilience" sa katawhan. (ICM)