GISUGDAN na sa Gilas Pilipinas nga tun-an ang mga estilo sa mga magduduwa sa Italy nga ilang unang makatigi sa Agosto 31 sa Foshan, China.
Gisulti ni Gilas national coach Yeng Guiao, duna silay mga defensive schemes nga ipatuman ug mga kabag-ohan sa ilang game plans sa pagtuon sa ilang mga makontra.
Giseguro sab niini ang kaandam nila sa tune-up games batok sa Australia una ang pagsugod sa FIBA World Cup.
Ang Italy nga dunay NBA players nahiluna sa ika-14 sa rankings sa FIBA sa tibuok kalibutan samtang layo sa ika-30 ang Pilipinas.
Apil sa mga NBA players sa Italy mao si Marco Belinelli sa Spurs ug ang 6’8” nga si Danilo Gallinari sa Clippers.
Tua na sa China ang advance party sa Gilas aron nga obserbahan ang ilang duwa sa makontra sa tim.
Gipangunahan kini ni Gilas deputy coach Sandy Arespacochaga alang sa scouting assignment.
Usa sa misyon niini mao ang pagtan-aw sa mini-pocket tournament tali sa Serbia ug Italy nga mahitabo sa Foshan, China.
Dugang pa sa deputy coach, magpabilin kini sa China og usa ka semana ug huwaton na lang ang pag-abot sa national team.
Kahinumdoman nga si chairman emeritus sa Samahang Basketbol ng Pilipinas nga si Manny V. Pangilinan masaligon sa tsans sa Gilas Pilipinas nga makasulod sa Top 16 sa umaabot nga Fiba Basketball World Cup sa China.
Atol sa send-off ceremonies niadtong Miyerkules sa Meralco Multi-Purpose Hall sa Ortigas, si Pangilinan nagkanayon nga dili imposible ang tinguha nga molampos sa first round batok sa Italy, Serbia ug Angola ang Gilas aron moabante sa round two nga langkuban unya sa 16 ka mga teams.
“(I’m) always optimistic,” matud sa basketball exec ug patron ug mihagit sa team nga palabwan pa niini ang ilang nahimo sa World Cup debut sa Spain, upat ka tuig ang nakalabay.
Aron kini makasulod sa sunod round, kinahanglan nga mokutlo og duha ka daug ang Gilas sa Group D. Ilang gitagna nga ang Angola maoy aduna silay dakong tsans nga makadaug ug ang Italy ang ikaduhang target.
“Take it one at a time,” pahimangno ni Pangilinan sa squad. (Uban sa taho sa SBCebu)