GUBOT pa sa lukot ang panghuna-huna karon sa 18 anyos nga lalake nga suspek sa pagpatay sa 10 anyos nga si Kiara Mae Namanama nga nakaplagan ang lawas niadtong Dominggo, Enero 9, 2022.
Kini ang nabantayan sa kapulisan sa Dakbayan sa Talisay tungod sa managlahi niining mga pamahayag ug naglisod sa pagkatulog.
Duna sab silay katingalahan nga nadunggan sa ilang recording sa pag-imbestigar nila kang Ian Rey Baculi.
Una nang gitug-an ni Baculi, taga Purok Avocado 2, Barangay Maghaway, dakbayan sa Talisay, nga nagbinugtong ra siya pagpatay kang Kiara Mae.
Apan sa interbyu sa sibyaanang dyHP sa Huwebes sa buntag, Enero 13, si Baculi nibutyag nga tulo ang iyang kuyog sa dihang gihimo ang krimen.
KAAWAY DIAY
Tungod niini, matod ni Police Lieutenant Colonel Randy Caballes, hepe sa kapulisan sa Dakbayan sa Talisay, nga ilang gibalikan si Baculi ug gipangutana sa mga ngalan sa iyang mga kuyog aron masusi.
“Ako na pud gipaadtoan didto kay naghikay na unta mi sa kaso unya lagi duna may laing statement niya, ako na pud gipalakaw kon unsa ka balido ang iyang tubag,”matod ni Caballes.
Ang tulo ka mga ngalan nga gibutyag ni Baculi ngadto na kanila ilang gisusi, giadto nila ang tulo.
Tuod man niboluntaryo og tahan uban sa ilang mga amo bit-bit sa ilang mga ebedensya nga nagpamatuod nga nanarbaho sila niadtong tungora dihang nahitabo ang krimen.
Si Caballes nidugang nga ang usa sa tulo gikasugmagay diay ni Baculi.
Ang usa drayber sa pasaheroang jeep ug ang usa truck boy sa tiglabay og basura.
“Pulos diay ning tulo nakakontra ni Baculi gumikan sab sa iyang pagkabadlungon didto sa ilang barangay. Nakita gyud nato nga gubot ang iyang huna-huna hinungdan sa iyang pagka inconsistent sa iyang mga tinubagan,” dugang ni Caballes.
Ang labing lig-on nga gikuptan karon sa Talisay Police mao ang pito ka testigo nga wala mobali sa ilang pamahayag nga si Baculi nagbinugtong lang sa paghimo sa krimen.
KAHIBULONGAN
Samtang duna usay gitug-an si Caballes sa mga sakop sa media nga gikompisal ni Baculi ngadto kanila.
Nisulti si Baculi kanila nga nagpakita kaniya si Kiara Mae hinungdan nga dili siya makatulog og tarong.
Usa ka video nga magpamatuod dihang gipangutana si Baculi sa imbestigador sa kaso nga iyang girekord ang panag-estorya.
Sa hinapus na hapit sa video, dunay madungog nga tingog sa bata nga daw kalit lang mibutho, sama sa tingog nga miginhawa, sama sa naghunghong nga gisundan sa tagning nga tingog nga nangayo og pakitabang.
Kagahapon, Biyernes, hingpit nang napasaka ang kasong murder batok kang Baculi samtang sunod nga ipasaka ang kasong rape apan kini mag base lamang sa kon unsay resulta sa awtopsiya kang Kiara Mae
Related story: 4 milugos sa 10-anyos?