Patay ang usa ka polis human gipusil sa makadaghan sa ilang target sa buy-bust sa Sitio Pagtambayayong, Barangay Kinasang-an, dakbayan sa Sugbo, alas 12:05 sa kaadlawon, Miyerkules, Nobiyembre 15, 2023.
Sumala sa tinubdan, ang biktima giila nga si Police Staff Sergeant Ryan Languido Baculi, 32, sakop sa Regional Police Drug Enforcement Unit (RPDEU 7), kinsa nakaangkon og tulo ka mga samad, duha sa kilid ug usa sa dughan.
Atol ning pagsuwat, wala pa matino ang kalibre sa armas nga gigamit sa suspek.
Sa imbestigasyon sa Inayawan Police Station ubos sa kamandoan ni Police Captain Jeciree Basitao, si Baculi maoy nagsilbing poseur buyer.
Ang subject sa buy-bust mao sila si Atong Rafols ug Ramil Salazar, alyas ‘Namol’, pulos lumolupyo sa dapit, nakasibat human sa hitabo.
NAKABANTAY
Sa buy-bust, ang mga suspek nakabantay o sama sa nasayod nga polis ang ilang gikasabot.
Ang mga kauban ni Baculi nakapwesto na sa ilang sakyanan sa duol samtang nagpaduol ngadto sa duha ka mga suspek apan kalit nga gipusil ug nahagba sa dan si Baculi human maigo.
Ang iyang mga kauban daling ningtabang ug ningbalos sa pagpamusil sa duha ka mga suspek nga nanagan nga gibiyaan ang ilang motorsiklo.
Ang usa sa mga suspek nga si ‘Atong’ giingong samdan sa kamot sa pagbalos sa kapulisan.
Samtang si Baculi nisulti sa iyang mga kauban nga naigo siya ug magpahatod sa osptal.
“Ayaw nalang na ninyo gukora (mga suspek), dalha ko ninyo sa tambalanan,” sulti ni Baculi ngadto sa mga kauban.
Gidala si Baculi sa ACE Medical Center apan gideklarar sa doktor nga dead on arrival.
Matod ni Police Lieutenant Colonel Gerard Ace Pelare, tigpamaba ni Police Brigadier General Anthony Aberin, hepe sa Police Regional Office (PRO 7), nga lehitimo ang operasyon sa RPDEU apan nakabantay ang ilang target.
Nagpadayon ang lapad nga manhunt sa kapulisan batok nilang Rafols ug Salazar nga gihulagway ni Pelare nga mga armed and dangerous nga dunay mga pending warrant of arrest sa kaso’ng murder ug frustrated murder.
Dugang ni Pelare nga si Atong, usa ka high value individual sa listahan sa kapulisan ug giila usab nga gun for hire ug hitman sa mga durugista.
Samtang, atol sa hitabo, na-monitor sa mga polis nga ang mga suspek nangayo og tabang sa usa ka barangay tanod sa Kinasang-an nga mao usab ang ni- rescue kanila gamit ang sakyanan sa barangay.
Gidala ang mga suspek sa ilang pinuy-anan ug wala usab, matod pa, motawag dayon og polis nga samdan man ang iyang gitabangan.
Tungod niini, matod ni Pelare, ila kining subayon kon duna bay kalapasan sa balaod ang maong barangay tanod.
