ADUNA nay 16 ka mga tawo nga naglangkob sa politiko ug civilian ang nahatagan sa kapulisan og temporary police escort.
Kini maoy gibutyag ni Police Regional Director Chief Supt. Lani-o Nerez kinsa nipatawag og meeting kagahapon sa buntag uban sa kadagkuan sa Commission on Elections (Comelec).
Matod ni Nerez nga aduna nay daghang ni-apply og police escort apan padayon pa ang ilang pagtuki.
Usa sa ilang nasabotan mao nga ang pag-apply sa mga politiko ug negosyante alang sa police escort di na kinahanglan pang adto ipahigayon sa Joint Security Control Center nga nahimutang sa PRO-7.
Gipasabot ni Nerez nga mahimong adto na lang sila mo-apply sa provincial command, o ba kaha city police office diin sila nagpuyo.
Samtang ang PRO-7 igo na lang nga mo-approve sa application human sa himuong pagtuon sa kapulisan kon unsa ka seryoso ang hulga ug angay ba silang hatagan og police escort.
Nagkanayon si Nerez nga lakip sa ilang gipatawag atol sa meeting mao ang pangulo sa Regional Mo-bile Group (RMG-7) nga si Se-nior Supt. Rey Lyndon Lawas.
Kini aron masuta kon aduna ba silay igong mga pulis nga mobantay sa mga dapit nga ibutang unya sa election watchlist atol sa election.
Si Nerez niingon nga ang first district sa Negros Oriental ug ang fourth district sa lalawigan sa Sugbo maoy usa sa ilang gitumbok nga ipailawom sa election watchlist.