DUHA ka mga tawo ang angol sa paghapak sa buhawi sa alas 4:00 sa hapon niadtong Martes didto sa Barangay Lumbo, siyudad sa Valencia, Bukidnon.

Ang grabeng naigo sa buhawi sa maong barangay mao ang Sitio Pakangan ug Sitio Sinanlayan.

Matud ni Juvinoni Eliaconi, coordinator sa Valencia City Disaster Coordinating Council (CDCC), nga moabot sa 84 ka mga pinuy-anan ang naguba, 16 di na mapuslan ug ang laing 68 mapuslan pa.

Gidugang pa ni Eliaconi nga lima ka mga poste sa kuryente nga gipanag-iyahan sa National Grid Corporation of the Philippines kun NGCP ang naguba sa trahedya.

Dugang pa niya, nakasinati sa power blackout ang mga siyudad sa Malaybalay ug Valencia, lungsod sa Maramag ug Kibawi sa maong probinsiya.

Sumala sa mga barangay opisyal nga niadtong mga orasa mibundak ang makusog nga ulan unya taud-taud ilang nakit-an ang naghaguros nga buhawi hinungdan nga nanagan ang katawhan paingon sa luwas nga dapit.

Milihok na ang mga lokal opisyal sa probinsiya sa Bukidnon aron matabangan ang mga biktima sa kalamidad. (Edgardo Fuerzas)