GIKUMPISKA sa mga sakop sa Digos City Police Office ang ubay-ubay nga mga bala ug armas gikan sa mamaligyaay human makalapas sa election gun ban nga gipatuman sa Commission on Election.

Mga alas 12:35 sa udto niadtong Sabado, sa pagpanguna ni Inspector Charlie Merka, sa pagpatrolya sa overland terminal sa dakbayan, nasikop si Manilyn Maloloy-on, 22 anyos, dalaga kaabag sa Shooters Guns Store, Kidapawan City Branch, molupyo sab sa maong siyudad ug Marizol Malinawon, 33, store assistant sa Shooters Gun and Ammo Corporation didto sa dakbayan sa General Santos.

Matud ni Merka, ang duha nakuhaan og 112 ka buhing bala sa kalibre 9mm nga pistola, 1,534 bala sa kalibre .45, 1,070 ka bala sa kalibre .38, 12 kabuok bala sa kalibre .357, 150 ka bala sa kalibre .40, 2,930 nga bala sa 12 gauge shotgun, 1,400 ka bala sa .22 kalibre, 150 rounds sa .22 MRF, ug 260 rounds sa .22 pellets.

Sumala sa kapulisan, nga nakuha sab gikan kanila ang SAS 12 gauge shotgun, 2

kabuok .22 air riffle retractable ug 1 kabuok .22 air riffle standard ug mga assorted nga spare sparts sa kalibre .45.

Gihimo sa kapulisan ang pagsikop sa duha human machine copies lang sa permit to transport sa mga armas ug bala ang ilang dala gikan sa Firearms and Explosive Division sa Camp Crame didto sa Quezon City, Manila.

Ni Merca, gitugtan ang Shooters Guns and Ammos Corporation nga makabiyahe sa mga armas ug mga bala gikan petsa 25 hangtud 31 sa Enero ning tuig.

Apan sumala pa nga wala sila makapakita og mga dokumento gikan sa buhatan sa Comelec alang sa pag-biyahe niini.

Gumikan sa hitabo, temporaryong gikustodiya una sa kapulisan ang mga armas, bala ingon man ang duha ka dinakpan sa ilang buhatan.

Gikatakdang subayon sab nila ang dalang permit sa mga nahisgutan.

Posibleng kasuhan ang duha sa paglapas sa Presidential Decree 1866 kalabot sa omnibus election code (gun ban). (Orlando B. Dinoy)