DUHA ka mga langyaw ning-report sa kapulisan sa Ronda, Sugbo nga sila gipamusil sa mga batan-ong lalake nga nag-motorsiklo samtang sakay sila sa ilang sakyanan.
Mga biktima giila nga sila si Bogdan Rusea, 27, ulitawo, usa ka architect nga Romanian national, ug si Marta Aguieszka, 26,dalaga, usa gihapon ka architect, taga Poland.
Sigun sa ilang asoy nga samtang sakay sila sa usa ka Toyota Vios (plate no YHW-693) nga gimaniho ni Rusea subay sa barangay road gikan sa lungsod sa Dalaguete paingon sa lungsod sa Ronda, gibanhigan sila.
Paghiabot sa may Sityo Bung-aw, barangay Malalay, kalit lang duha ka mga batan-on nga sakay sa motorsiklo ningsikit kanila.
Ang angkas nition kanilag armas hinungdan nga ilang gipakusgan ang dagan ug mao nalay ilang nadungog ang tulo ka sunodsunod nga mga buto sa armas.
Sa pakisusi sa kapulisan, naigo sa bala ang walang bahin sa awto tungod sa atubangan sa pultahan.
Wa pa matino ang motibo sa pagpamusil, apan dunay mga pagduda nga tulis ang motibo niini.
Hayan buot pahunungon sa mga gunman ang mga langyaw, apan napakyas sila mao nga gipusil.
Ang Ronda gitumbok nga kuyaw nga lugar panahon sa eleksyon tungod sa presensya sa armadong mga grupo sa kabukiran niini.