LAING tawo na sab ang gibuno sa tulo ka mga suspetsado nga nagsakay og motorsiklo dinhi sa siyudad sa Davao niadtong Dominggo.

Ang insidente nahitabo sa alas 10:09 sa buntag samtang nagtindog ang biktima duol sa LCC Building nga nahimutang sa Magallanes Extension, Bankerohan, ning siyudad.

Ang biktima giila lamang sa pangalan nga Jay Ar, alyas Rian, 21, dunay live-in partner, way trabaho, lumad nga taga Mati, Davao Oriental ug nagpuyo sa Gravahan, Barangay Matina Crossing, ning siyudad.

Si Police Officer 3 Sherwin Arbania sa San Pedro Police Station nagbutyag sa iyang spot report nga kalit giduol sa tulo ka mga tawo ang biktima samtang nagtindog sa nahisgotang lugar ug way daghang pangutana gipusil ang biktima tumong sa ulo.

Matud ni Arbania nga nakabsan dayon sa kinabuhi ang biktima human sa pagpusil kaniya, sigun sa deklarasyon sa mga sakop sa Scene of the Crime Operatives (Soco).

Human sa pagpamusil, suma sa mga nakasaksi, daling mibiya ang tulo ka mga tawo sakay sa usa ka motorisiklo paingon sa wa masayri nga lugar.

Sa gihimong makuting imbestigasyon sa kapulisan, nailhan ang mga suspetsado nga mao sila alyas Jojo Putot, alyas Michael, ug alyas Dodong, sigun sa usa ka saksi nga nagpaila lamang sa pangalan nga Jay.

Si Jay misaysay sa pulis nga si Jojo maoy nagmaneho sa motorsiklo, samtang si Michael maoy mipusil sa biktima gamit ang wa masayri nga kalibre sa armas ug nagsilbi sab nga look-out si Dodong.

Ang kapulisan nagduda nga personal nga bangi ang motibo sa mga suspetsado nganong ilang gipatay ang biktima hinungdan nga ila karong gihimo ang makuting imbestigasyon.

Samtang gisuwat ning balita, gipangita na sa kapulisan ang mga suspetsado aron sikupon ug pasakaan og kaso ngadto sa korte tungod sa kasong pagpatay. (Alger Dura)