USA ka lalaki gitulis sa upat ka wa mailhing mga tawo nga lulan sa motorsiklo didto sa Purok 8, Barangay Alejal, lungsod sa Carmen, Davao del Norte, Lunes sa gabii.
Nailhan ang biktima nga mao si Jovannie Besingga, 22, ug molupyo sa Purok 5, Barangay San Juan, Tibungco, siyudad sa Davao.
Sa report nga nakutlo gikan sa Davao del Norte Police Provincial Office kagahapon, nasayran nga nahitabo ang pagpanulis pasado alas 11:30 sa gabii didto sa maong lugar sa dihang nagmaneho sa iyang Multicab si Besingga, kalit matud pa miabot ang upat ka wa mailhing mga lalaking sakay sa usa ka Honda XRM ug Honda Wave nga motor ug mitapad ngadto sa biktima.
Dihang nakahigayon, gitionan sa usa ka suspek og pusil si Besingga ug mideklara og tulis.
Sa kahadlok, wa nay nahimo si Besingga ug napugos sa pagtugyan sa iyang bag nga dunay sulod nga kuwarta nga balor og P23 mil.
Ang upat ka mga suspek abtik nga misibat padulong sa wa matino nga lugar human makuha ang ilang tuyo.
Ang biktimang si Besingga midangop na lamang ngadto sa buhatan sa Carmen Municipal Police Station.
Kapulisan sa lungsod sa Carmem mihimo na karon og dugang imbestigasyon sa hitabo. (Marvin Pineda)