TULO ka mga bayot ang napatay human nabangga sa usa ka 10-wheeler truck ang ilang gisakyang motorsiklo alas 8:00 sa gabii, Biyernes, didto sa probinsiya sa Sarangani.

Usa sa biktima giila nga si Richard Oponda, samtang ang duha pabilin pang giila sa kapulisan.

Matud sa inahan ni Oponda nga si Ronella Oponda, tulo ang sakay sa XRM nga motorsiklo padulong sa Sarangani Province gikan sa siyudad sa General Santos dihang nahitabo ang trahedya.

Tungod sa ngitngit ug dangog nga dalan wala mabantayi sa nagmaneho sa motorsiklo ang nakaparadang trak nga puno sa ginabas nga kahoy nga nadautan sa dalan.

Ang trak giparada sa daplin tungod kay nadautan.

Natuhog sa kahoy ang ulo sa usa sa mga biktima, diin ang duha namatay diha-diha dayon.

Si Oponda nadala pa sa Tiburcio Hospital sa Kiamba, apan gibalhin sa District Hospital sa Gensan apan way suwerte tungod namatay gihapon kini.

Ang drayber sa 10-wheeler truck nga wala hinganli gikostudiya na sab sa Kiamba Police Station.

Gisukit-sukit karon ang drayber kon nganong wala kini magbutang og signboard timaan nga nadautan ang iyang gimanehong trak nga miresulta sa maduguong aksidente. (Edgardo Fuerzas)