KASONG pagpangilad ang giatubang sa tulo ka mga suspek nga nalambigit sa pagbaligya og mga peke nga bulawan alas 4:00 sa hapon niadtong Martes didto sa probinsiya sa Bukidnon.

Mga suspek nadakpan sa hiniusang puwersa sa Regional Special Operations Group (RSOG-10) pangulohan ni Police Supt. Rey Reyes ug Malaybalay City Police Office sa Bukidnon.

Giila ni Superintendent Erwin Meneses, hepe sa Malaybalay City PNP ang mga dinakpan nga sila Benedicto Jenon, alyas Benjie Sarmiento, Berto Baracero ug live-in partner niini nga si Annie Palmero atol sa gihimong entrapment operation.

Gikanayon ni Meneses nga ang nahisgutang grupo maoy mga responsable sa pag-ilad sa usa ka Korean national human gibaligyaan og peke nga bulawan.

Nakuha sa posisyon sa mga suspek ang usa ka peke nga gold bar ug P100,000 nga salaping cash isip marked money.

Hangtud sa pagsulat ning balita, padayon ang gihimong pagsukit-sukit sa otoridad aron madakpan ang mga kauban sa mga suspek nga naglihok sa Bukidnon ug sa North Cotabato. (Edgardo Fuerzas)