UPAT ka mga drug pushers mag-atubang og kasong paglapas sa Republic Act 9165 kun Dangerous Drugs Act of 2002 human sila nasikop sa mga sakop sa Philippine Drug Enforcement Agency (PDEA) ug Davao City Police Office (DCPO) sa alas 3:00 pasado sa hapon niadtong Miyerkules.

Nasikop mao sila Carlito Ariño, alyas Titoy, 44, minyo, nagpuyo sa V. Mapa Street, Barangay 11-B Poblacion; Marvin Macastor, alyas Payat, 31, trisikad driver, nagpuyo sa Piapi Boulevard; Rolando Macastor Jr., 33, nagpuyo sa Purok 6, Barangay 31-D Poblacion; ug Athlen Ganzo, 36, ug nagpuyo sa Doña Asuncion, Barangay Sasa.

Si PDEA Regional Director Roybel Sanchez nagbutyag nga unang nasikop mao si Ariño pinaagi sa buy-bust operation.

Matud ni Sanchez nga giposasan ang biktima human niya gitunol ang usa ka pakite nga shabu ngadto sa ahente nga nagtakuban nga buyer shabu.

Sa samang higayon, nasikop sab sila Macastor, Macastor Jr. ug Ganzo dihang gironda ang ilang gitagoan nga balay didto sa Barangay 31-D Poblacion pinaagi sa gahum sa search warrant nga gipaguwa ni Executive Judge Isaac Robillo Jr. sa Regional Trial Court (RTC) Branch 13.

Nakuha gikan nila ang duha ka mga pakiteng shabu, tulo ka stick sa marijuana ug daghang mga shabu paraphernalia sama sa tooter, gunting, lighter, aluminum foil ug mga plstic nga butanganan og shabu.

Ang upat atua karon sa selda sa PDEA 11 samtang nagpaabot kanus-a sila moatubang sa korte. (AD)