GIDAKOP sa kapulisan ang 50 anyos nga lalaking minyo human niguwa ang orden de aresto batok kaniya didto sa lungsod sa Matanao, Davao del Sur.

Ang hepe sa Matanao Police nga si Senior Inspector Charlie Merca, nag-ila sa dinakpan nga si Isabelo Gabaldon, molupyo sa Barangay New Murcia, Matanao.

Nasikop ang suspek banda alas 10:30 sa buntag niadtong milabay'ng adlaw, human nasiplatan nga didto kini sa iyang pinuy-anan.

Sa pag-abot sa grupo ni Merca, gilayon niining gipakita ang mandong gipaguwa sa Regional Trial Court (RTC) Branch 18 nga pirmado ni Presiding Judge Carmelita Sarno-Davin.

Matud ni Merca, nag-atubang ang suspek sa criminal case number FC-30-11 alang sa “grave slander by deed.”

Pebrero 24 ning tuig, dihang niguwa ang Warrant of Arrest (WoA) batok sa suspek mao nga dihang naka-tiyempo ang kapulisan ila gyud kining nadala sa ilang buhatan ug gipadlak sa selda.

Naghuwat karon ang Matanao police sa mosunod nga sugyot sa korte batok sa dinakpan. (Orlando Dinoy)