USA ka negusyante ang gisikop sa mga otoridad human nasakpan sa akto nga naghit-hit og marijuana sulod sa comfort room sa usa ka mall sa siyudad sa Davao niadtong Lunes.
Gisikop mao si Cholito Lu, 60, minyo, nagpuyo sa Jacinto Apartment, Suazo Extension, ning siyudad.
Si Lu gibalhog sa selda sa Sta. Ana Police Station sa alas 6:25 sa gabii human miangkon nga siya ang tawo nga naghit-hit og marijuana.
Si Andy Guzman, security guard sa mall, nagbutyag sa kapulisan nga nahibulong siya human napanimahoan ang baho sa marijuana mao nga iyang gisulod ang comfort room diin nasiplatan ang suspetsado.
Tungod niini, ang suspetsado gidala sa security guard sa ilang opisina dayon gi endosar ngadto kang PO3 Dennis Morales sa Sta. Ana Police Station.
Nakuha gikan sa suspetsado ang 12.8 gramong marijuana ug walo ka mga alcoy.
Giduso na kagahapon ang kasong paglapas sa Republic Act 9165 kun Comprehensive Dangerous Drugs Act of 2002 batok sa suspetsado didto sa City Prosecution Office (CPO).
Sa laing bahin, ang Philippine Drug Enforcement Agency (PDEA) sa Davao ug Carmelo C. De Los Cientos Sr. National Trade School (CCNTS) naghiusa sa pagsaulog sa International Day Against Drug Abuse and Illicit Trafficking (Idadait) didto sa Southern Paligue, Padada, Davao del Sur niadtong Hulyo 2.
Ang kasaulogan gipangulohan ni PDEA director Roybel Sanchez ug CCNTS vocational school administrator Engr. Alfredo Panuela Jr.
Sa maong kasaulogan, gihimo nila ang Fun Run 2010 ug Symposium on Illicit Trafficking and Drug Abuse Prevention nga gisalmotan sa 239 ka mga partisipante sama sa school administrators, estudyante ug personahe sa PDEA.
Si PDEA Director Sanchez nagbutyag nga ang maong kalihukan gisugdan sa tulo ka kilometro nga dagan (fun run) sa lungsod sa Padada ug gisundan sa programa, paduwa ug awarding ceremony.
"The highlight of the activity was a symposium on illicit trafficking and drug abuse prevention. Various points were discussed including drug identification and the adverse effects of illicit drug use," ni Sanchez sa iyang pamahayag sa SuperBalita.
Mga estudyante giingon nga mipakita sa ilang kadasig sa pagsumpo sa illegal nga druga.
Ang maong aktibidad usa sa mga paningkamot sa PDEA diin gilambigit ang tanang sektor sa katilingban ilabi na ang mga tulunghaan aron sumpuon ang illegal nga druga. (Alger Dura)