96 ka de kalibreng armas ang giputol-putol ug gisunog kagahapon sa buntag sa 4th Infantry Division sa Camp Evangelista, Patag, ning siyudad.

Matud ni Colonel Raul Azcueta, commanding officer, sa 10th FSSU-4ID nga ang maong mga armas gisunog tungod kay non-standard o dili kini haum sa tukma nga pagkahimo base sa resulta sa imbestigasyon sa Armed Forces of the Philippines (AFP).

Si Azcueta nagkanayon nga angayan lamang i-dispose ang maong mga armas aron nga dili na kini magamit pa tungod sa ka-delikado niini.

"Sa bakal pa lang, makikita na natin na hindi talaga siya standard. So, we better dispose it totally before somebody uses it," matud ni Azcueta.

Pipila sa de kalibreng mga armas ang kalibre .45, RPG ug caliber 50 Barret.

Matud pa niya, ang nasangpit nga mga armas gikan na-recover, nabawi ug gi-surrender sa mga rebeldeng New People's Army (NPA) gikan niadtong Abril 2010 hangtud karon.

Dugang pa niya, improvised o binuhat lamang kini nga mga armas sa mga rebelde alang sa ilang depensa sa kaugalingon tungod kay lisod alang kanila ang pagpalit ug armas nga rekomendado sa AFP.

Sa ilang hamubo nga programa, giaghat ni Captain Romeo Santiago O. Nebres, deputy commander, Eastern Mindanao Command, ang kadagkoan sa arms disposal committee nga magpadayon sa ilang seryoso nga panerbisyo ngadto sa katawhan.

Si Nebres ang chairman sa arms disposal committee ug miyembro si Azcueta. (Loui S. Maliza)