GIPAKURATAN sa Agro-Industrial Foundation College of the Philippines (AIFCP) Sailors ang Davao Champions League (DCL) champion Jose Maria College (JMC) Kings, 55-49, aron makuha ang ikaduhang daug sa 2014 Davao City Private Schools Athletic Association (DSA) Meet basketball competition didto sa University of Mindanao (UM) Gym niadtong Huwebes sa gabii.

Nakuha sa Sailors, ang unang puwesto sa men's bracket nga dunay limpyong 2-0 samtang natagak ang Kings, 2-1 sa rekord.

Una nang gipildi sa Agro, 86-38, ang STI College.

Sa bahin sa JMC, nakuha ang unang pildi luyo nga gipukan ang DMMA Colleges of Southern Philippines (DMMACSP), 76-73, ug Rizal Memorial Colleges (RMC) Bulldogs, 81-50, sa milabay nga duwa.

Sa bracket B, ang UM Wildcats nasungkit ang ikaduhang daug batok Mats College of Technology, 55-49, aron malista ang 2-0 nga karta.

Ang University of the Immaculate Conception (UIC) dunay 2-1 record aron makuha ang ikaduhang puwesto gisundan sa 0-1 Davao Doctors College ug 0-2 Mats.

Dulaon na sab ang torneyo karong adlawa kon diin ang duha ka tim nga manguna sa matag grupo moabante sa semi-finals sa liga nga qualifying sa Southern Mindanao Private Schools Athletic Association (Prisaa) Meet sa Peb. 21 hangtud 23 didto sa Davao del Norte Sports and Tourism Complex sa siyudad Tagum City. (MLSA)