GISIKPAW sa kapulisan ang usa ka babayeng nag-tubang og kasong qualified theft human mipagawas ang hukmanan og warrant of arrest batok kaniya.

Si Rosalinda Matundan, 56, minyo ug lumolupyo sa Barangay Palili, sakop sa lungsod sa Padada, Davao del Sur, nadakpan sa kapulisan banda alas 11:00 sa buntag niadtong Miyerkules.

Si Police Inspector Arnold Absin, hepe sa kapulisan sa Padada, nagbutyag nga ang warrant of arrest gipagawas ni Judge Carmelita Sarno-Davin sa Regional Trial Court Branch 18 sa maong probinsiya.

Ang suspek nag-atubang og upat ka kasong kriminal nga nakadoket sa criminal case number 141 (08) 142 (08) 143 (08) ug 144 (08) tungod sa pagpangawat.

Hinuon, ang suspek mahimo pang makaangkon og temporaryong kagawasan kon ugaling mopiyansa siya og P30 mil.

Wala nay nahimo si Matundan sa dihang naabtan mismo sa kapulisan didto sa iyang pinuy-anan mao nga malinawon nga miuban sa kapulisan.

Gikustodiya na karon sa selda sa kapulisan ang dinakpan ug gipaabot na lang ang sunod nga mando sa hukmanan sa disposisyon sa iyang kaso. (Dondon Dinoy)