BANSALAN, Davao del Sur - Usa ka pamilya ang wa magtuo nga mawad-an sila og mahalong gamit ug salapi niadtong Martes sa buntag.

Sumala ni Police Sr. Insp. Jeffrey Latayada, hepe sa kapulisan sa Bansalan, nagpatabang kanila ang pamilyang Nahine human nabiktima sa wa mailhing babaye nga gidudahang sakop sa Salisi Gang.

Ang babaye malampusong mitangag sa ilang Laptop ug salapi nga P25-mil.

Gikanayon ni Latayada nga nagpakiluoy ang babaye niadtong Lunes sa gabii nga wa siyay masak-an hinungdan nga naluoy ang pamilya, gipatulog siya.

"Naluoy sila kay niingon man daw ning babaye nga sa kalsada na lang siya matulog, unya kay gabii na lagi mao tong gipadayon," ni Latayada.

Martes sa buntag naligo pa ang babaye una kini milakaw.

Uwahi na dihang nadiskubrehan sa pamilya nga nawad-an na diay sila og gamit.

Matud ni Latayada nga leksyon na kini sa ubang tawo nga di mokompisyansa sa mga tawong magpaaron-ingon nga way masak-an nga balay. (Orlando Dinoy)