USA ka barangay kapitan ang gipusil sa mga armado nga tawo sa alas 2:40 sa hapon niadtong Lunes didto sa probinsiya sa Sultan Kudarat.

Giila sa kapulisan ang biktima nga mao si Romeo Sombrito, 56, minyo ug kapitan sa Barangay Pimbalayan, Lambayong, sa maong probinsiya.

Sigun sa nahagpat nga taho gikan sa Sultan Kudarat Police Provincial Office, nagtindog lang ang biktima sa bagsakan area duol sa iyang pinuy-anan sa dihang dunay miduol nga wala mailhing mga armado nga lalaki ug gipusil siya gamit ang kalibre .45 nga pistola.

Patay gilayon si Sombrito nga naigo sa iyang ulo, dughan ug tiyan samtang ang mga mamumuno dali nga misibat sakay sa usa ka motorsiklo paingon sa wala matino nga direksyon.

Gipahayag ni Felizardo Tampus, pag-umangkon sa biktima, nga sa wa pa gipatay ang iyang uyoan nakasulti kini ngadto sa iyang pamilya nga duna kini nadawat nga hulga sa kinabuhi gikan sa wala matino nga grupo.

Dako ang pagtuo ni Sultan Kudarat Governor Ismael Mangudadatu nga posibling politika ang motibo sa pagpatay sa biktima tungod sa nagsingabot nga piliay sa barangay ug Sangguniang Kabataan.

Sumala ni Sultan Kudarat Police Provincial Director Teng Tucao Mamalinta, duna nay mga suspek nga gisundan ang kapulisan nga maoy gitumbok sa krimen. (Edgardo Fuerzas)