GIKLARO karon sa Commission on Elections (Comelec) nga di puwedeng irason ni 8-division world champion Manny Pacquiao ang pagpasa og certificate of candidacy (CoC) aron iatras ang iyang away sa Nobyembre.

Matud ni Comelec spokesman James Jimenez, puwede sab mag-file og CoC ang usa ka kandidato pinaagi sa pagpadala og mga dokumento sa usa ka otorisadong opisina.

Kahinumdoman, giingon nga ang subli nga pagdagan isip kongresista sa 2013 midterm election ang hinungdan kung nganong di una idayon ang November 10 fight ni Pacquiao.

Matud ni Mike Koncz, ang Canadian adviser ni Pacman, di sila gustong dunay harang sa himuong training sa pound-for-pound king hinungdan nga mas maayong kanselahon una ang comeback fight niya.