NASAKMIT na gyud ni Francisco "Django" Bustamante ang dugay na niyang gipangandoy nga titulo sa 2010 World Pool Championship pinaagi sa 13-7 nga kadaugan batok kang Taiwanese "The Little" Monster" Kuo Po-cheng sa finals kagahapon sa Doha, Qatar.

Alang kang Bustamante, nakumpleto na gyud ang iyang pag­kabilyarista human niya naangkon ang labing pretihiyusong titulo sa kalibutan sa billiards.

Updates on President Benigno Aquino III's presidency

"Sa wakas nakumpleto na din ang pagiging bilyarista natin.

Lahat kasi ito ang pangarap maging WPA World 9-ball champion," matod sa lumad nga taga Tarlac City sa usa ka news release pinaagi sa email.

"Salamat sa Diyos ito na lang ang missing sa career ni Django (Bustamante)," matod sa manager ni Bstamante nga si Philippine Billiards God Father Aristeo "Putch" Puyat.

Paingon sa finals, gipukan ni Bustamante ang kababayang si Antonio "Nickoy" Lining, 11-5, samtang si Kuo milupig kang Johnny Archer sa United States, 11-10, sa semi-finals.

Sa kalampusan, si Bustamante nakabulsa og $36,000 unya si Kuo nakakuha og $18,000 samtang sila si Lining ug Archer nakaangkon og $10,000 matag usa.

Kini maoy ikaupat nga titulo nga naangkon ni Bustamante human siya nahisakop sa Team Asia nga ningpukan sa Team Europe niadtong Enero 17 sa Brunei.

Ang ubang mga sakop sa Team Asia mao sila si Hall of Famer Efren "Bata" Reyes, Hui Chan Lu ug Ko Pin-yi sa Taiwan ug Teo Che Soon sa Brunei.

Kahinumdoman nga niadtong 2002, maayo sab gyud unta ang dagan sa duwa ni Bustamante sa World Pool Championship apan samtang nagpadayon ang kombati sa Cardiff, Wales, si Bustamante nakadawat og tawag gikan sa Pilipinas aron ipahibalo nga namatay ang iyang anak nga batang babaye.

Dili na unta motiwas si Bustamante sa pagduwa sa torneyo aron makabalik dayon sa Pilipinas.

Hinuon nakumbinsir siya sa iyang asawa nga ipadayon lang gyud ang duwa kay mao kini ang gustong mahitabo sa ilang anak.

Tuod man nipadayon og duwa si Bustamante apan napilde ni American Earl Strickland.

Labing seguro, mao gyud kini ang labing dili makalimtan nga kasinatian ni Bustamante sa World Pool Championship.