PATAY ang usa ka 21 anyos nga lalaki human nabangga ang gimanehong motorsiklo niadtong Lunes mga alas 10:30 sa gabii sa Barangay Katipunan, lungsod sa Villanueva, Misamis Oriental.

Giila ang biktima nga mao si Danny Cortes, 21, minyo, taga Zone-3, sa susamang dapit.

Sa inisyal nga report gikan sa Northern Mindanao Medical Center (NMMC) diin gidala ang biktima, nasuta nga pauli na unta ang kini sakay sa kaugalingon nga motorsiklo dihang kalit lang kining nasungag sa laing motorsiklo nga gimaneho sa laing lalaki nga adunay apelyido nga Magtrayo.

Si Cortes usa ka habal-habal driver sa maong lugar ug pauli na niadtong tungora gikan namasahero.

Tungod sa kakusog sa pagkabangga nabunal ang ulo niini sa semento nga maoy hinungdan sa iyang kamatayon.

Gisuwayan pa og dala sa NMMC sa paglaum nga mabuhi apan dead on arrival kining gideklarar sa doctor.

Ang suspek detinado na ning panahon sa Villanueva Police Station. (SVB)