BOLUNTARYONG ni-ampo sa kapulisan ang usa ka lalaking minyo kinsa nag atubang og kasong frustrated murder didto sa lungsod sa Jose Abad Santos, Davao del Sur.

Nitahan sa kapulisan si Jerson Masangkay, molupyo sa Barangay Caburan Big sa lugar, mga alas 7 sa buntag, Biyernes human nasuta niini nga nigula na ang iyang orden de aresto.

Si Masangkay, sumala ni Senior Inspector Glenford Alberto, nag atubang sa criminal case number 116 (08) sanglit diriyot kining nakapatay sa ilang lugar.

Apan wa na gisugilon sa kapulisan kon kinsa ang nahimong biktima niini sanglit sa milabay nga tuig pa nahitabo ang maong kaso.

Gihikay dayon sa kapulisan ang pagbalhin sa suspek ngadto sa Bureau of Jail Management and Penology didto sa dakbayan sa Digos.

Sa laing hitabo, gisignit sab sa kapulisan didto sa lungsod sa Sta. Cruz, Davao del Sur, ang usa ka 48 anyos nga babayeng negusiyante kinsa nag atubang sa kasong estafa.

Si Senior Inspector Alfredo Santillana, hepe sa kapulisan, nangulo sa pagsikop ni Florencia (apilyedo gipugngan) minyo ug taga Barangay Tagabuli sa lugar, mga alas 10:45 sa buntag sa maong adlaw.

Asoy sa kapulisan, gimando ni Executive Judge Carmelita Sarno-Davin sa Regional Trial Court Branch 18 ang pagsikop sa suspek.

Hinuon, ang mando sa korte naglakip sa paghatag kaniya og temporaryong kagawasan kun makahatag siya og piyansa nga P16 mil.

Temporaryong gitanggong sa ilang buhatan ang dinakpan samtang gihuwat ang laing lakang sa korte. (Dondon Dinoy)