NILANDING sa balay tambalanan ang 18 anyos nga dalaga human milala og hilo niadtong Sabado mga alas 8:30 sa gabii sa Macabalan ning siyudad sa Cagayan de Oro.

Giila ang biktima nga mao si Jenelyn Capistrano, susamang dapit kinsa nakaplagan sa mismong inahan niining si Rosana nga wala nay panimuot ug tupad ang botelya sa malathione.

Ang inahan sa biktima nibutyag sa Sun.Star Superbalita nga kalagot ug kaulaw ang iyang gibati sa gihimo niini nga kung walay pagmahal batok sa anak dili na lamang dalahon sa Northern Mindanao Medical Center (NMMC) aron patambalan.

"Naghikog man, dalhon pa gyod sa ospital, nagduda ko nga gibulagan gyod ni sa iyang uyab," matud ni Rosana.

Gituohan sa inahan nga gibulagan sa uyab ang iyang anak hinungdan sa paghikog labina nga maayo man ang ilang relasyon sa pamilya ug wala kini nakaaway, gani maayo ang performance niini sa tunghaan nga gi-skwelahan.

Tuod man luwas sa makuyawng kahimtang sa Jenelyn apan walay puas ang tambag nga gihimo sa inahan niini sama sa dili magpaapekto sa problema niini labina gyod ang kalambigitan sa gugma.

Gani gipanawagan niini ang mga batan-on nga dili himuon ang susama sa gihimo sa iyang anak tungod kay ang kinabuhi dili angayng usikan. (SVB)