PANGULO sa Police Regional Office, Chief Supt. Lani-o Nerez nimando sa iyang tanang mga sakop sa pagpatuman sa mga checkpoint matag adlaw.
Kini nunot sa pagsugod na sa election period sa miaging adlaw, diin usa sa mga tahas nga gisangon sa Philippine National Police (PNP) mao ang pagpahigayon sa mga checkpoint.
Ang kapulisan ubos na sab sa kamandoan sa Commission on Elections (Comelec).
Ang kapulisan wa nay himuong mga revamp sa ilang mga sakop nga di mananghid sa Comelec kay gidili sab kini.
Mao ni ang hinungdan nga daling gihimo ang revamp sa upat ka mga opisyal sa kapulisan sa rehiyon.
Matod ni Nerez nga ang checkpoint gitumong aron hingpit nga mapatuman ang gun ban ug dakpon gyod kadtong mga tawo nga magdalag armas bisan pag pulis o sundawo basta magdalag armas nga wa mag-uniporme.
Si Nerez niingon nga iya pang gipaabot ang report sa tanang mga provincial ug city director kon duna ba silay nadakpan sa unang adlaw sa pagpatuman sa gun ban.
Sa siyudad sa Sugbo, gipahigayon sab ang mga checkpoint.
Kanunay na sab kining gihimo ni City police director Sr. Supt. Patrocinio Comendador, labina sa mga taho nga dunay mga tulisan nga nangabot dinhi gikan sa Mindanao.
Gibawi na sab ang mga bodyguard sa mga opisyal ug mahibalik lang kini kon sila mohangyo sa Comelec.
Apan higpit kaayo ang proseso alang niini. (DRT)