USA ka lalaki kritikal ang kahimtang karon sulod sa ospital human gitigbas sa iyang silingan didto sa Purok Everlasting, Barangay Mamanla, lungsod sa

San Isidro, Davao del Norte, Lunes sa gabii.

Nailhan ang biktima nga mao si Silverio Torres, hamtung ang panuigon, ug molupyo sa susamang dapit.

Samtang ang suspek mao ang silingan sa biktima nga si Venerando Capio.

Sa nahagpat nga report gikan sa Davao del Norte Police Provincial Office kagahapon nasayran nga pasado alas 6:00 sa gabii samtang didto sa iyang balay si Torres, gisulong siya ni Capio sa iyang balay aron komprontahon tungod sa ilang bangi mahitungod sa asawa ni Torres.

Misangko sa pag-init ang panagsumpaki sa ilang panagtagpo resulta sa pagtigbas sa suspek ngadto sa biktima gamit ang dala niyang sundang.

Si Torres daling gidala sa Davao Regional Hospital sa siyudad sa Tagum aron mapatambalan human nahiagum og mga samad sa kalawasan.

Samtang ang suspek nga si Capio mitahan sa iyang kaugalingon ngadto sa mga otoridad.

Kapulisan sa lungsod sa San Isidro mihimo na karon og dugang imbestigasyon samtang gihikay na ang kaso batok sa suspek. (Marvin Pineda)