USA ka detachment sa army ang gikatahong gihasi sa mga gidudahang sakop sa rebelding New People's Army, didto sa Sitio Depot, Barangay Upper Ulip, lungsod sa Monkayo, Comval Province, Biyernes sa hapon.

Sa report gikan sa Comval Province Police Provincial Office nasayran nga pasado alas 4:30 sa hapon, kapin 50 ka mga gituohang sakop sa NPA ang nanghasi sa Cliffhanger Detachment sa 25th Infantry Battalion sa Philippine Army sa nahisgutang lugar.

Nakahimo pa sa pagsukol ang tropa sa kasundaluhan ug nahitabo ang sinukliay og bala tali sa duha ka mga grupo.

Gituohan nga mga sakop sa Front Committee 20 sa New People's Army pinanguluhan sa usa ka Kumander Daryl ang nagpaluyo sa hitabo.

Hinuon way gikatahong samdan o angol sa duha ka pundok sa maong engkwentro.

Mga rebelde daling miikyas padulong sa direksyon sa Surigao del Sur human sa hitabo.

Sa wa pa giharas sa mga rebelde ang detachment, ila sab nga gisamok ang mga guwardya sa usa ka kompaniya nga nahimutang sa may Purok 17, Barangay Tinago, Mt. Diwata, lungsod sa Monkayo.

Kasundaluhan mihimo na karon og hot pursuit operation aron sa paggukod sa mga NPA nga miikyas. (Marvin Pineda)