ANDAM na ang kapulisan sa lalawigan ug siyudad sa Sugbo sa pagpatuman sa kahusay ug kalinaw sa pagbukas sa unang adlaw sa kampanya sa local nga mga kandidato.
Si Acting Cebu Provincial Director Erson Digal nimando na sa iyang mga ginsakpan sa kalungsora.
Siya niingon nga ang mga hepe sa kapulisan sa lalawigan iyang gimandoan nga bantayan ang ilang mga lugar aron malikayan ang kasamok ug mahapsay ang opening salvo sa mga kandidato ubos sa ilang area of jurisdiction.
Gipahinumduman ni Digal ang kapulisan nga di mopaduol sa mga kandidato atol sa ilang rally nga himuon aron malikayan ang mga pagduda nga midapig sila og mga kandidato.
Ang matag kandidato aduna nay gidistino nga mga pulis isip ilang bodyguard.
Ang mga pulis igo lang mo-secure sa mga area diin himuon ang rally ug mopatunhay sa kahusay ug kalinaw sa dapit.
Samtang ang mga kandidato giawhag usab ni Digal nga magmabugnawon panahon sa ilang pulong-pulong.
Hisgutan ang ilang mga plata porma de gobyerno, di ang mga personal nga negatibong komento sa isig ka kandidato aron malikayan ang kasamok.
Iya sab nga giawhag ang mga supporter sa mga kandidato nga di magpadala sa init sa pagpaluyo nila sa usa ka kandidato.
Iya sab nga gipahimangnoan ang iyang mga sakop nga di mangampanya o mag-apil-apil sa pulitika, sama sa pag-apil sa pagpanghatag og fliers.
Wa hinuon nila did-i ang mga pulitiko sa pagbisita sa mga presento.
Samtang sa dakbayan sa Sugbo, si Cebu City Police Director Senior Superintendent Patrocenio Comendador niingon nga dugay na nilang gipangandaman ang unang adlaw sa pagpangampanya.
Bugtong nila nga i-monitor kon kini naimplementar ba sa mga hepe sa kapulisan sa matag presento.
Pipila ka mga dapit sa lalawigan sa Sugbo gibantayan sa kapulisan kon angay bang ibutang sa watchlist alang sa eleksyon. (JFT/dugang taho ni Flornia Marie M. Gitgano-CNU Intern)