NADALA sa balay tambalanan ang usa ka lalaki human kini gipusil sa wala maila nga mga suspetsado mga alas 10:30 sa gabii adlaw nga Martes sa Taguanao, Barangay Indahag, siyudad sa Cagayan de Oro.

Sa inisyal nga imbestigasyon sa kapolisan sa Police Station 2 (PS2) sa Cogon, nasayran nga ang biktima naila nga si Julius Dela Cruz Lao, 33, ug residente sa Barangay Indahag ning siyudad.

Gibutyag sa kapolisan nga unang nitawag ang usa ka guwardiya sa Maria Reyna Xavier University Hospital human adunay gidala nga usa ka pasyente sa mga nagpakabanang katawhan.

Dali nga miresponde ang mga kapolisan sa maong taho ug nasuta nga duha ka wala maila nga suspetsado ang sakay sa XRM nga motorsiklo ang mipusil sa biktima.

Gituohang kanhi nga bikil ang motibo sa maong pagpamusil.

Nakaangkon ang biktima og samad sa iyang wala nga bahin sa tiyan.

Ang maong panghitabo padayon pa nga giimbestigahan sa mga kapolisan sa PS2 aron masuta ang tinuod nga hinungdan sa maong insidente samtang ang mga suspetsado gawasnon pa karong panahona.