NAUKAY ang Barangay Astorga, lungsod sa Sta. Cruz, Davao del Sur human nabangalan ang patay'ng lawas sa usa ka lalaki niadtong Biyernes sa buntag.

Si Chief Inspector Demetrius Taypen, hepe sa kapulisan, nga nanguna sa pagtubag sa alarma nagkanayon nga didto sa Sitio Idong napalgan ang patay'ng lawas.

Ang biktima, nailhang si Florito Mintal, 46, minyo ug drayber sa lugar.

Sumala sa mga silingan, uwahing nakit-an kini nga nanugway pa sa iyang binuhing kabayo, banda alas 6:45 ang takna sa buntag.

Apan ang iyang silingan nga mao si Jorge Obeda, 25, ulitawo, nitataw sa kapulisan nga sa hagdanan sa balay aduna'y mga tulo sa dugo mao nga sa iyang pagsubay iyang natultulan ug nakit-an sa tugkaran nga wa na'y kinabuhi si Mintal.

Matod sa kapulisan, ang dugo nanukad gikan sa baba niini tungod sa sakit nga wa hinuon nila gibutyag.

Wa'y nakitang foul play sa krimen si Taypen mao nga gipadala na lang nila didto sa Toril Community Cooperative Funeral Homes ang patay'ng lawas niini aron ipailawom sa otopsiya.

Gitahasan gihapon ni Taypen si Police Officer 2 Elmer Bañagaso aron mohimo og dugang pagsukit-sukit sa hitabo. (Dondon Dinoy)