MGA langyaw nagrambol sulod sa usa ka imnanan tungod sa usa ka guest relation officer (GRO).

Kini nahitabo sa usa ka imnanan sa Archbishop Reyes avenue, pasado alas 4 kagahapon sa kaadlawon.

Ang bugtong nagpa-blotter sa kapolisan sa Mabolo mao si Peter Cristofferson, 24, temporaryong nagpuyo sa Holy Family Village, Barangay Banilad ug usa ka Danish national, nagtungha dinhi sa Sugbo.

Gibana-bana nga tulo ka mga Norwegian national ang gikaengkwentro ni Cristofferson.

Subay sa iyang aligasyon ngadto kang SPO1 Hanz Wenceslao sa Mabolo Police nga nag-inom siya sa maong imnanan sa dihang iyang gikahimamat ang usa ka GRO sa usa ka laing imnanan.

Sa kalit lang, niduol ang usa ka langyaw ug nasuko kini kaniya tungod sa iyang pagtagad sa maong babaye.

Nahitabo ang ilang lalis, hangtod nga misunod ang rambol. Nipunit og botilya ang suspek ug gihapos sa nawong sa biktima.