GATUSAN na ka mga pamilya ang namakwet padung sa luwas nga lugar tungod sa panag-engkwentro sa magka-away nga mga pamilya sa probinsiya sa Maguindanao.

Si 6th Infantry Division Chief Colonel Benjamin Hao sa Philippine Army nagsulti nga banda alas 7:40 sa gabii niadtong Hulyo 11, subling gisulong sa grupo ni Kumander Tatah Puti Uy, miyembro sa Moro Islamic Liberation Front (MILF) Lost Command, ang posisyon sa mga sakop sa Civilian Volunteer Organization (CVO) ug Citizen Armed Forces Geographical Unit (Cafgu) didto sa Barangay Reyna Reginte, Datu Piang.

Apan daling nasiplatan sa puwersa sa kagamhanan hinungdan nga nahitabo ang 15 minutos nga sinukliay og mga bala tali sa duha ka mga grupo.

Walay naangol sa mga sakop sa CVO ug Cafgu samtang dili pa matino kon duna bay samaran sa mga sakop ni Uy.

Miatras ang mga rebelde sa diha nga nahiabot ang mga ginsakpan sa militar nga maoy mihatag og seguridad sa mga sibilyan nga naipit sa kagubot.

Gibutyag ni Maguindanao Police Provincial Director Alex Lineses nga hangtud karon nagdumili pa si Kumander Uy sa paggawas sa iyang gilubloban alang sa malinawon nga negusasyon sa iyang uyoan nga si Datu Piang Mayor Datu Sammer Uy Tan aron resulbahon ang ilang away sa politika.

Nagbahad sab si Governor Esmail Toto Mangundadatu ngadto sa duha ka grupo nga kon dili sila magkasabot alang sa kalinaw ug kahupsay sa ilang dapit, mapugos ang militar ug kapulisan sa paglihok aron ipatuman ang balaod. (Edgardo Fuerzas)