NADUNGGABAN na hinuon ang usa ka pintor human kini mangumedya sa iyang higala nga giingong ‘nakahithit’ og marijuana.
Ang pagpanunggab nahitabo sa Tabok Kanal, Baranay Basak, San Nicolas, siyudad sa Sugbo, pasado alas 9:00 sa milabayng gabii.
Samdan sa makaduha sa iyang lawas mao si Jupiter Pitellar, 33, ug nagpuyo sa maong dapit.
Usa ka ginganlan og “Jun-Jun” maoy gitumbok nga nagdunggab sa biktima.
Sa taho nga nasayran gikan kang PO3 Julius Mabunay sa Homicide Section nagbutyag nga nag-inom ang biktima uban sa iyang mga higala.
Sumala sa taho sa kapulisan, ang suspek uban sa usa ka laing silingan nga gituohang naghithit og marijuana ug gi-komedyahan kini sa biktima.
“… ahh bonding kaayo sila dah, loving kaayo sila, mao to nga nasuko ang suspetsado” matud ni Mabunay.
Wa damha sa biktima nga samtang naglakaw na siya pauli na unta sa ila, giatngan siya sa suspek ug dayong gidunggab makaduha ka higayon.
Daling nibiya sa dapit ang suspek human sa pagdunggab.