MITUGPA sa balay tambalanan ang usa ka mag-uuma human gitigbas og lagaraw dihang giulang ang nag-away nga managsuon nga iyang kainom.

Ang insidente nahitabo alas 6:10 sa gabii, Huwebes, didto sa Barangay Catigan, Toril District, Davao City.

Sa inisyal nga imbestigasyon ni Senior Police Officer 1 (SPO1) Michael A. Escandor sa Toril Police Station, giila ang biktima nga si Antonio Antiga Alo Jr., 29, minyo, residente sa Purok 6, Milagrosa, Barangay Catigan, samtang ang suspek mao si Randy Cabusas, mag-uuma, silingan ra sab biktima.

Nasayran nga nag-inom ang biktima ug suspek lakip ang ang upat pa ka mga higala.

Giingong naglalis ang magsuong Claudio ug Alvin Lahay-Lahay mao nga giulang sila sa biktima.

Daling miabot ang anak sa bayaw sa magsuon nga si Randy Cabusas nga nagdala’g sundang dayon gitigbas ang biktima sa hawak.

Human sa hitabo, daling misibat ang suspek og gipangita na sa kapulisan.

Ang biktima padayong gi-obserbahan sa mga doktor sud sa ospital. (Jeepy P. Compio)