TULO ka mga higala ang nangaangol human gidaro sa motorsiklo samtang nag-inom daplin sa dalan niadtong Lunes mga alas 9:10 sa gabii sa Taguanao, Indahag ning siyudad sa Cagayan de Oro.

Giila ang mga biktima nga mao sila si Carlos Padilla, 21; Robert Roleta, 24 ug Junjie Sanchez, 17, kinsa maoy nagrabehan ug talandugon ang kahimtang ning panahona.

Nasayran nga nag-inom daplin sa dalan ang mga biktima dihang kalit lang mitipas sa dalan ang usa ka motorsiklo ug nipaingon ngadto kanila.

Wala na makalihok ang mga biktima dihang kalit kaayo ang hitabo ug nalatayan sa motorsiklo.

Dali nga gipangdala ang mga biktima sa Northern Mindanao Medical Center (NMMC), apan nagrabehan pag-ayo si Sanchez human nabali ang tiil ug nalatayan ang lawas niini.

Si Padilla nakaangkon usab og samad sa kilay nga bahin ug bun-og sa nagkadaiyang parte sa lawas. Samtang si Roleta samaran ang agtang ug grabeng pangos sa nawong.

Ang driver dihang nagkagubot na ang mga residente ang daling nakabakod ug giingong misibat sakay pagbalik sa motorsiklo.

Ang kaso gisunod sa Roads and Traffic Administration human wala pa maila ang driver nga gituohang samaran gihapon niadtong gabhiona. (SVB)