USA ka lalaki nga sakay sa iyang motorsiklo nabalintong ug nilagpot, patay human nawad-an og kontrol sa manobela.

Nahitabo ang insidente mga alas 6 sa gabii, Dominggo, didto sa lungsod sa Sulop, Davao del Sur.

Nailhan ang biktima nga mao si Marquin Quijano Alimento, minyo, 24, ug lumolupyo sa Purok 11, Barangay Poblacion sa maong lugar.

Si PO1 Joeji Cababat, kinsa nisusi sa insidente, nagkanayon nga gikan ang biktima sa Barangay Waterfall ug padung unta sa Barangay Poblacion apan wa na makalahos human nisirko ang gimanehong motorsiklo.

Sa pagsusi sa kapulisan, nasayran nga usa ka drayber og habal-habal ang biktima apan student permit lang ang iyang lisensiya samtang nagmaneho sa kolor pula nga Honda XRM 125, nagbaton og plakang LH-7031.

Gihulagway sa kapulisan nga nawad-an og balanse ang biktima pag-abot niya sa Purok sa Barangay Waterfall mao nga natumba ang sakyanan.

Naigo ang ulo sa biktima sa usa ka poste sa kural human nilupad sa walang bahin sa dalan ang motorsiklo, matud ni Cababat.

Patay gilayon ang drayber ug gidala didto sa Collado Funeral Homes samtang ang motorsiklo gikustodiya sa pulis sa ilang buhatan. (Dondon Dinoy)