DILI man sa ingon nga dili gyud ko motuo niining mga surveys. Ang mga mohimo sa survey adunay mga formula nga gisunod labi pa kining mga scientific surveys. Aduna man god poy survey nga inato lang. Pero daghan man god ang mga pangutana nga motumaw kon gi-unsa paghimo ang survey. Kinsang grupo ang nagpaluyo sa maong survey? Kinsa ang mga tawo nga gihimong respondents o kining gipangutana sa mga surveyors. Pilay pangidaron?
Unsay social standing? Mga adunahan ba, middle class o ang mga pobre? Mao na siyay gitawag nga demographics (hut-ong sa mga tawo nga gi-survey).
Pero kining mga political survey nga nanggawas karon, gihimo kini nga sumbanan sa mga kandidato kabahin sa ilang gikusgon sa pulitika ug ingon man kon gidawat ba sila sa mga botante. Pero dili gyud sila makasiguro nga mao kini ang tinud-anay nga mogawas human na unya sa pinili-ay. Dili angay kining ikapanghambog. Dili angay nga seryusohon.
PAGKAMAYOR
Ang Political Science Department sa University of San Carlos mipagawas sa resulta sa ilang gihimong survey kabahin sa mga kandidato dinhi sa dakbayan sa Sugbo karong bag-o. Base sa maong survey, sikit ang resulta tali nila ni reelectionist Mayor Michael Rama ug ni Kong. Tomas Osmeña sa pagkamayor. Medyo labaw lang, matod pa, gamay si Tomas. Si Mike daling misalindot sa maong resulta. Samtang si Tomas medyo nakapanghambog gamay dala ang pag-ingon nga sinyales na kini sa iyang kadaugan.
Usahay makadala baya kana sa huna-huna sa katawhan o kon sa ininglis pa “banwagon effect.” Pero dili pa makapangangkon si Tomas sa iyang kadaugan kon kana lang ang atong pagabasihan. Unya na siya mo-angkon hangtod maihap ang katapusanng balota ug madeklarar na siyang mananaog. Sa pikas nga bahin, kining maong resulta makahatag usab og giya ni Mike nga gikinahanglan pang doblihon ang iyang paningkamot aron mosaka ang iyang ratings.
KADUDAHAN
Pero unsa ka tinuod kining maong taho nga atong nasagap nga ang maong survey gipaluyuhan diay sa taga Bando Osmeña Pundok Kauswagan (BOPK)? Unya gigamit lang ang mga taga Pol Sci department sa maong unibersidad? Ang bata-bata matod pa ni Tomas nga gihinganlan og Rene Senapo ang nagpaluyo niini? Tinuod ni? Aw, medyo kadudahan na.
Niadtong 2010 elections, base sa survey, sikit ang panagribal nila ni Mar Roxas ug Loren Legarda sa pagka-bise presidente. Nagtuo kita nga usa nila ni Mar ug Loren mao ang modaog. Apan naunsa bang pagka-unsa nga si Jejomar Binay man lagi ang midaog.
Wala gyud ta magdahum. Bisan ako, wala magdahum nga si Binay maoy modaog. Mao nay usa sa mga rason nga dili dayon ta motuo sa mga survey. (bobby.nalzaro@yahoo.com)