NORTH COTABATO - Patay ang usa ka negusiyante human gipusil alas 8:02 sa buntag niadtong Domingo didto sa siyudad sa Kidapawan.

Giila ang biktima nga mao si Jhonny Balgos, 35, minyo, nanag-iya ug tindahan sa Datu Ingkal Street, Barangay Poblacion.

Nasayran gikan sa spot report sa Kidapawan Police Office nga samtang paggawas na ang biktima sa iyang bay kalit mibutho ang duha ka wala mailhing tawo dayon gipusil siya gamit ang .45 kalibre nga pistola.

Abtik sab nga misibat ang mga suspetsado sakay sa motorsiklo nga walay plaka paingon sa wala matino nga dapit dihang nakita nila nga naligo na ang biktima sa iyang dugo.

Patay gilayon si Balgos tungod kay naigo sa ulo ug dughan, suma sa mirespondeng kapulisan.

Hustisya karon ang gisinggit sa pamilya sa biktima nga gidudahang gipatay sa Sparrow Unit sa New People's Army (NPA).

Hangtud karon blangko pa ang kapulisan kon kinsa ang mga tawo nga dunay kalabutan sa pagpatay sa biktima. (Edgardo Fuerzas)