USA ka negusiyante ang gipusil ug napatay sa alas 5:20 sa hapon niadtong Dominggo didto sa siyudad sa Cotabato.
Ang kapulisan nag-ila sa biktima nga mao si Daud Acmad, 33, minyo, namaligya og ukay-ukay ug molupyo Barangay Kalanganan Uno sa maong siyudad.
Gibutyag ni Cotabato City Police Director Willie Dangane nga sakay ang biktima sa usa ka payong-payong nga traysikad sa Megamarket sa dihang giatngan sa duha ka wala mailhing mga suspetsado ug gipusil gamit ang kalibre .45 nga pistola.
Patay gilayon si Acmad nga naigo sa iyang ulo ug dughan samtang nasamdan ang usa ka sibilyan nga si Watani Amir nga naigo sa iyang nawong sa saag nga bala.
Dali sab nga misibat ang mga mamumuno sakay sa XRM nga motorsiklo paingon sa wala matino nga direksyon.
Matud ni Abig Acmad, paryente sa biktima, nga duna na silay gidudahan nga mga suspek sa maong hitabo.
Hinuon, ang kapulisan padayon pang nag-imbestigar sa hitabo aron nga mailhan ug masilotan ang mga suspek sa salaod nga ilang gihimo. (Edgardo Fuerzas)