DAVAO CITY - Mokabat sa P500 mil ang danyos sa napulo ka mga panimalay human masunog alas 2:30 sa kaadlawon, kagahapon, Martes, didto sa Jasmine Alley, Purok 5, Barangay 6-A Poblacion.

Subay sa inisyal nga impormasyon gikan sa Bureau of Fire and Protection (BFP) ug sa San Pedro Police Station kalit miulbo ang kalayo gikan sa tindahan ni Jimmy Comaias.

Tapot lawas lamang ang nadala sa mga molupyo sanglit nakuyawan ug wala na nakapanghipos og mga gamit kay nahitabo ang insidente samtang nangatulog sila.

Bisan ang balay sa kapitan sa barangay nga si Franklin Librado naapil sa sunog.

Si Senior Fire Officer (SFO1) Jose Fuerto imbestigador sa Bureau of Fire nagsulti nga napasagdang nakasaksak nga appliances ang hinungdan sa sunog.

Mokabat sa tunga sa milyon ka pesos ang danyos sa nahisgutang sunog. (Jeepy P. Compio)