GIBANABANA nga minilyon ka pesos ang nahimong danyos sa nahitabong pagbaha sa tulo ka probinsiya Davao Region.

Samtang gilauman nga mosaka pa ang ihap sa mga naapektuhan sa padayon nga pagbaha sa rehiyon.

Nasayran nga miabot na og 13 ka mga tawo ang namatay tungod sa landslide ug mga pagbaha sa Compostela Valley ug Davao Oriental, ug Davao del Norte.

Mikabat pod sa napulo ang nangawala samtang 34 ka mga tawo ang nasamdan.

Sumala pa nga miabot na sa 3,179 ka mga pamilya o kapin 12,000 ka mga tawo ang gipahikling sa DavNor ug ComVal lamang tungod sa mga pagbaha.

Suspendido sab ang mga klase gikan sa nursery ngadto sa high school sa tibuok DavNor samtang sa ComVal way klase ang tanang lebel.

Gituohan nga minilyon ka pesos ang nahimong kadaut sa baha human nga daghang mga imprastraktura ang naguba sama sa tulay, kabalayan, kalsada ug mga pananom sa maong mga probinsiya. (Teddy Cabana)