SUBLING gitanyagan sa wala magpailang grupo og dakong kandidad ang mga pamilya sa mga biktima sa masaker sa Maguindanao.

Si Ric Cachuela, chairman sa Justice Now Movement (JNM) nagsulti nga dunay mga tawo nga nagsunod-sunod sa pamilya sa mga sakop sa media nga gipangpatay sa Sitio Masalay, Barangay Salman, Ampatuan, Maguindanao ug mitanyag og P300 mil hangtud tunga sa milyon ka pesos aron lamang i-atras ang kaso nga ilang gisang-at batok sa mga Ampatuan.

Gidugang ni Cachuela nga dili mabayran og kandidad ang niluog nga kamatayon sa mga biktima sa masaker.

Apan dili sab niya mabasol kadtong gusto nga magpabayad gumikan sa kapit-os sa panahon ug ilabina nga hangtud karon wala pa gyud makab-ot ang tinuod nga hustisya.

Gibutyag ni Maguindanao Governor Esmael "Toto" Mangudadatu nga dunay lain pa silang testigo nga andam nga magpamatuod nga si kanhi Datu Unsay Mayor Datu Andal Ampatuan Jr ug iyang amahan maoy nagplano sa masaker.

Giklaro ni Mangudadatu nga ang wala pagtambong ni Andal Jr. unya nagpakaarong-ingnon nga dunay sakit klaro kaayo nga guilty kini ug dili makaharong sa pag-atubang kang Senior Inspector Rex Diongon nga usa sa mga suspek apan mibali ug mitestigo na karon batok sa mga Ampatuan. (Edgardo Fuerzas)