DUNAY usa ka gatos ka mga bag-ong polis nga nadestino sa Cagayan de Oro City Police Office (Cocpo) alang sa Field training Program isip kabahin sa ilang on the job training sa dili pa matapos ang ilang Public Safety Basic Recruit Course (PSBRC).

Ang maong 100 ka mga Police Officer 1 gidestino sa nagkadaiyang dapit ning siyudad alang sa police visibility.

Si Police Inspector Lemuel Gonda, hepe sa Police Station 1 (PS1) nibutyag sa Sun.Star Superbalita nga malaumon siya nga makatabang ang mga bag-ong polis sa kahapsay ug kalinaw sa dakbayan.

Gilauman nga tungod sa police visibility maminosan ang mga petty crimes ug mamintinar ang kahusay ug kalinaw sa siyudad.

Namatikdan sa bisan asang kanto ning siyudad ang mga polis kauban ang mga nag-observe nga mga tinun-an sa Capitol University.

Matud ni Gonda nga moabot ngadto sa usa ka tuig ang himuong police visibility sa maong mga bag-ong polis subay sa ilang field training.

Pipila kanila magpatrolya, mag-atiman sa dagan sa trapiko ingon man pag-obserbar sa mga dautang elemento.

Ang field training program mao ang paghaw-as sa usa ka peace officers gikan sa academic setting paingon ngadto sa pagdestino ug paghimo isip usa ka law enforcer.

Bisan paman sa pipila ka tuig gitun-an sa maong polis ang teorya sa ilang panarbaho apan makab-ot nila kini pinaagi sa FTP.

Matud ni Gonda nga ning panahona anaa sila kanunay nga mag-supervise sa maong mga bag-ong polis. (Stephanie V. Berganio)