NAGBANGIS sa 4th quarter si Jayford Rodriguez aron aswaton ang Talisay cagers ngadto sa 85-81 nga kadaugan batok sa Asian College of Technology (ACT) Cyber Knights kagahapon sa M.Lhuillier Kwarta Padala-Cebu Basketball Association (CBA) sa Cebu Coliseum.

Ang produkto sa UV Green Lancers nakatigom og 31 puntos, 16 niini sa 4th quarter.

Sa sayong bahin, nagkagidlay ang opensa sa Talisay ug nakontrolar sa Cyber Knights ang duwa sa nag-unang tulo ka quarters sa pagpangulo ni John Villaver.

Apan pagsugod sa 4th quarter, daw nag-inusarang sundalo si Rodriguez nga nakigkombati sa tibuok puwersa sa Cyber Knights ug wala gyud kini kapugngi hangtod nga hingpit niining natuboy ang Talisay sa kadaugan.

Ang Talisay naggunit na karon og 2-2 nga rekord samtang ang Cyber Knights nahagsa sa 1-3 nga baraha.

Ning pagsuwat, padayon pang nagsangka sa main game ang league-leaders nga Salazar College of Science Institute and Technology Skyblazers ug Ave Maria Sanctuary Park.

Puntos kada usa:

Talisay (85)- Rodriguez 31, Lusdoc 13, Belande 8, Bolias 8, Colegado 7, Reyes 5, Mercader 5, Basco 5 ACT (81)- Villaver 20, Nuñez 14, Caputolan 11, Galinato 10, Ursal 6, Akad 6, Sevilla 4, Sampilo 4, Luga 2, Bucao 2, Valencia 2.