MAGAMIT na karong adlawa sa mga motorista ang tunnel sud sa 24 oras ang Cebu South Coastal Road Properties (CSCRP) nga magsugod karong alas 6:00 sa buntag.
Mga pulis i-detail sa area aron sa pagpatunhay sa kahusay ug kalinaw, ilabi na nga wa pa mogana ang mga security camera.
Si former Cebu City Councilor Sylvan Jakosalem, chairman sa City Traffic Operations Management (Citom), nibutyag nga sud sa 24 oras sa tibuok semana nga magpabilin na nga bukas ang tunnel sa tanang motorista.
Apan nauyonan human sa tigom tali nila ni Jakosalem, representante sa Kajima Construction ug Department of Public Works and Highways (DPWH) nga gidid-an sa pag-agi kadtong mga nagbiseklita, pedestrians o mga tawo ug mga 6 wheeler truck pataas, garbage trucks ubang mga cargo truck nga nagkarga og flammable chemical sama sa gasolina o liquefied petroleum gas (LPG).
Nipasabot si Jakosalem nga sa higayon nga maaberiya ang dagkong mga sakyanan giisip nga dakong problema sanglit matanggong ang ubang mga motorista diha sa tunnel.
Did-an usab kadtong mga sakyanan nga mohunong diha sa tunnel aron sa pagpahuway o pag-stand by ug bantayan usab kadtong nagtinguha sa pag-vandalize sa tunnel. Masaligon si Jakosalem nga ma-decongest ang kahuot sa trapiko sa downtown area sanglit lahos na ang motorista ngadto sa norte ug sa south. (FVQ)